काठमाडौंः सरकारले मेडिकल कलेजलाई दिएको २४ घण्टे अल्टिमेटममा कलेज सञ्चालकले विद्यार्थीको अतिरिक्त शुल्क फिर्ता नगर्ने अडान लिएका छन् । कलेज सञ्चालकको अडानपछि अब कसरी अघि बढ्ने भनेर सरकारले छलफल शुरु गरेको छ ।
छलफलमा गृहमन्त्री रामबहादुर थापा बादल, शिक्षामन्त्री गिरिराजमणि पोखरेल, महान्यायाधिवक्ता अग्नि खरेललगायत सहभागी भएको बताइएको छ । यसअघि आज मङ्गलबार नै शिक्षा, विज्ञान तथा प्रविधिमन्त्री गिरिराजमणि पोखरेलसँग भेट गरी कलेज सञ्चालकहरूले अतिरिक्त शुल्क फिर्ता नगर्ने आशयको पत्र शिक्षामन्त्रीलाई बुझाएका थिए ।
सरकारले एमबीबीएस अध्ययनका लागि उपत्यकाबाहिर ४२ लाख ५० हजार र उपत्यकाभित्र ३८ लाख ५० हजार शैक्षिक शुल्क तोकेको छ ।