स्वर्ण पदक विजेता संगीता धामी । तस्बिरः राष्ट्रिय खेलकुद परिषद
जनकपुरः १३ औं दक्षिण एशियाली खेलकुद (साग) अन्तर्गत भएको कुस्तीको महिला ५५ केजीमा नेपालकी संगीता धामीले शनिबार स्वर्ण जितेकी छन् । उनले बंगलादेशकी रिमे सर्केरलाई पराजित गरिन् । सागमा कुस्तीतर्फ नेपाली खेलाडीले पाएको यो नै पहिलो स्वर्ण हो ।
महिलाको ५७ केजीमा भने भारतकी सरिता पहिलो भइन् । नेपालकी अम्बिका भण्डारी दोस्रो भइन् । ७६ केजीमा भारतकी गुर्शरणा प्रीति कपुरले स्वर्ण तथा श्रीलंकाकी चान्तले रजत जिते ।
पुरुष ७० केजीमा पाकिस्तानका अयात उल्लाह पहिलो, श्रीलंकाका निल दोस्रो र नेपालका सुरेश चुनारा तेश्रो भए । पुरुष ७९ केजीमा पाकिस्तानका रेहमानले स्वर्ण, श्रीलंकाका अनाकाले रजत र नेपालका बुन्नीलाल राउत ऐरले कास्य हात पारे । पुरुष ९७ केजीमा भारतका काडियन सत्यवर्थ प्रथम, पाकिस्तानका अयाब द्वितीय र बंगलादेशका अवला दराबुरोसित तृतीय भए । पुरुष १ सय २५ केजीमा भारतका सुमितले स्वर्ण, पाकिस्तानका जमान अन्वरले रजत र नेपालका राज यादवले कास्य जिते ।