सागमा सबैभन्दा धेरै पौडीमा ३८ स्वर्ण, अन्य कुनकुन खेलमा कति स्वर्णका लागि हुँदैछ प्रतियोगिता

  •  
  • 2
  •  
  •  
  •  
  •  
  •  
  •  
  •  

काठमाडौंः १३ औं दक्षिण एशियाली खेलकुद (साग) मा पौडी विधामा सबैभन्दा बढी पदकका लागि प्रतियोगिता हुने भएको छ । सागको प्राविधिक समितिले जनाएअनुसार ३ सय १७ स्वर्ण र त्यत्तिकै सङ्ख्यामा रजत पदकका लागि प्रतिस्पर्धा हुने छ । त्यसैगरी, कास्य पदकको सङ्ख्या भने ४ सय ८१ रहेको छ ।

सागमा पौडीमा सर्वाधिक ३८ स्वर्ण पदकका लागि प्रतिस्पर्धा हुने छ । यसैगरी एथ्लेटिक्समा ३६ स्वर्ण पदकका लागि प्रतिस्पर्धा हुँदा उसुमा २२ स्वर्णका लागि प्रतिस्पर्धा हुने छ । तेक्वान्दोमा २९ तथा भारोत्तोलन, कुस्ती र सुटिङमा २०–२० स्वर्ण पदकका लागि प्रतिस्पर्धा हुने छ ।

करातेमा १९ तथा बक्सिङमा १६ स्वर्ण पदकका लागि भीडन्त हुने छ । यसैगरी, जुडोमा १५, फेन्सिङमा १२ र आर्चरीमा १० स्वर्ण पदकका लागि खेलाडीले प्रतिस्पर्धा गर्नेछन् । साइक्लिङमा ८ तथा ब्याडमिन्टन, टेबलटेनिस र टेनिसमा ७–७ स्वर्ण पदकका लागि भीडन्त हुने छ । ट्रायथलनमा ५ स्वर्ण पदकका लागि प्रतिस्पर्धा हुँदा स्क्वास र गल्फमा ४ स्वर्णका लागि भीडन्त हुने छ ।

यस्तै, बास्केटबल, थ्री बाई थ्री बास्केटबल, क्रिकेट, फुटबल, ह्याण्डबल, कबड्डी, खोखो, भलिबल र बीच भलिबलमा २–२ ओटा स्वर्ण पदकका लागि प्रतिस्पर्धा हुने भएको छ ।