विराटचोकः सरकारी स्वामित्वमा रहेको नेपाल राष्ट्र बैंकले २३ वर्षपछि शेयरधनीको लागि लाभांश प्रस्ताव गरेपछि आज सो कम्पनीको शेयर किन्न लगानीकर्ता झुम्मिएका छन् ।
बजार खुलेको १ घण्टामै सो कम्पनीको उच्च अङ्कको शेयर किनबेच भएको छ । आइतबार प्रतिकित्ता ३ सय १९ रुपैयाँमा बन्द भएको सो कम्पनीको शेयर आज २ प्रतिशत बढेर ३ सय २५ रुपैयाँमा खुलेको थियो । पछि मूल्य बढ्दै ३ सय ३२ रुपैयाँसम्म पुगे पनि अहिले भने ३ सय २३ रुपैयाँमा कारोबार भइरहेको नेपाल स्टक एक्सचेञ्जले जनाएको छ ।
१ घण्टाको समयमा जम्मा ८ करोड ४६ रुपैयाँको शेयर कारोबार हुँदा नेपाल बैंकको मात्रै ३ करोड ९० लाख २० हजार रुपैयाँको शेयर किनबेच भएको छ । मार्केट डेप्थ हेर्दा नेप्सेको सूचकसँगै क्रेता र बिक्रेताबीच तीव्र मोलमोलाइ भइरहेको देख्न सकिन्छ । अहिले सो कम्पनीको शेयर बेच्नेभन्दा किन्ने लगानीकर्ता बढी देखिन्छन् । १ लाख ३० हजार ४ सय ५ कित्ता शेयर खरीद अर्डर रहेको छ भने ८३ हजार ४८ कित्ता शेयर बिक्री अर्डरमा देख्न सकिन्छ ।
सो बैंकको सञ्चालन समितिको हिजो बसेको बैठकले लगानीकर्तालाई १५ प्रतिशत शेयर बोनस र करसहित १० प्रतिशत नगद बोनस दिने निर्णय गरेको थियो । सो जानकारी पाएपछि लगानीकर्ता नेपाल बैंकको शेयर खरीदमा झुम्मिएका हुन् । सो लाभांश नेपाल राष्ट्र बैंकको स्वीकृति र बैंकको साधारणसभाले पास गरेपछि मात्रै लगानीकर्ताले पाउँछन् । 