बेलबारीका साहित्यकार इरान राईले आफुले प्रकासन गरेको ‘लिम्पियाधुरा’ पुस्तक विश्वकै सबै भन्दा सानो पुस्तक हुन सक्ने भन्दै त्यसका लागि गिनिज वर्ल्ड रेकर्डमा दावी प्रस्तुत गर्ने बताउनुभएको छ । राईद्वारा लिखित निकै साना आकारका हाइकु संग्रह पुस्तकहरु ‘लिम्पियाधुरा’ र ‘पुरानो काग’ गत माघ २७ गते प्रधानमन्त्री निवास बालुवाटारमा प्रधानमन्त्री केपी शर्मा ओलीकै उपस्थितिमा सार्वजनिकीकरण गरिएका थिए । लिम्पियाधुरा हाइकु संग्रह पुस्तकको लम्बाई १.५ सेन्टीमिटर र चौडाई ०.७५ सेन्टीमिटर मात्रै रहेको छ । १.१३ वर्ग सेन्टीमिटरको पुस्तक लिम्पियाधुरामा ६६ वटा हाइकु संग्रहित छन् । पुरानो काग पुस्तकको लम्बाई १.७५ र चौडाई ०.७५ सेन्टीमिटर रहेको छ । १.३१ वर्ग सेन्टिमिटरको सो पुस्तकमा ७६ वटा हाइकु संग्रहित छन् । पुरानो कागमा पुर्णरुपमा व्यंग्यप्रधान हाइकु संग्रहित रहेका छन् ।
आफ्ना यी दुई कृति मध्ये लिम्पियाधुरा विश्वकै सानो पुस्तकाकार साहित्यिक कृति हुनसक्ने राईको दावी छ । आवश्यक प्रकृया पुरा गरेर गिनिज वर्ल्ड रेकर्डमा यसबारे दावी प्रस्तुत गर्ने तयारीमा रहेको राईले शनिबार जानकारी दिनुभएको हो । बेलबारीमा सञ्चारकर्मीसँग कुराकानी गर्दै राईले केही नयाँपन दिन र नेपाली भाषा प्रतिको बढ्दो उदासिनतालाई चिर्दै यी पुस्तककै माध्यमबाट नेपाली भाषाप्रति विश्वको ध्यान आकृष्ट गर्न र भाषिक प्रवद्र्धन प्रयासका लागि पनि पुस्तक प्रकासनमा ल्याएको जानकारी दिनुभयो ।
साहित्य सिर्जनामा सामान्य भन्दा केही भिन्न र नयाँपन मिसाउने एक पछि अर्को प्रयासमा रहनुभएका राईले यसअघि पनि नेपालको राष्ट्रिय झण्डाको आकारमा झण्डा कविता पुस्तक प्रकासन गरिसक्नुभएको छ । उहाँको झण्डा कविता २०६० सालमा प्रकासित भएको थियो । राईका अन्य १ दर्जन कृतिहरु प्रकासित रहेका छन् ।