प्रेम केडि
पथरी / मोरङको पथरीशनिश्चरे नगरपालिका–३ स्थित गोहिहोलि खोलामा निर्माण हुन लागेको पुल सोमबार एक विशेष समारोहबीच शिलान्यास गरिएको छ। करिब ३० वर्षदेखि स्थानीयको मुख्य आवश्यकता मानिँदै आएको सो पुलको शिलान्यास कार्यक्रममा पूर्व सांसद एवं नेपाली कांग्रेसका युवा नेता सुनिल शर्मालाई स्थानीयले नौमती बाजा, सांस्कृतिक झाँकी र फूलमाला सहित भव्य स्वागत गरेका थिए।
कार्यक्रममा प्रदेशसभा सदस्य गीता तिम्सिना, प्रदेश सांसद मानवबहादुर लिम्बू, पथरीशनिश्चरे नगरपालिकाका मेयर मोहन तुम्वापो, उपमेयर, वडाध्यक्ष तथा स्थानीय जनप्रतिनिधिको उपस्थिति रहेको थियो। पुल शिलान्यास स्थलमा बिहानैदेखि नै स्थानीय बासिन्दाहरूको भीड लाग्नुका साथै उत्साह, उमङ्ग र हर्षोल्लासको वातावरण रहेको देखिन्थ्यो।
स्थानीयका अनुसार गोहिहोलि खोलामा पुल नहुँदा यहाँको जनजीवन लामो समयदेखि प्रभावित हुँदै आएको थियो। वर्षायाममा आवत–जावत जोखिमपूर्ण मात्र होइन, स्वास्थ्य उपचार, शिक्षा, व्यापार–व्यवसाय र दैनिक क्रियाकलापमै बाधा पर्ने समस्या थियो। “हामीले यो पुलका लागि वर्षौँदेखि माग गर्दै आएको हो, आज सपना पुरा हुँदैछ,” स्थानीयवासीहरूले खुसी व्यक्त गर्दै भने।
पिपलचोकलाई किरातिचोकसँग जोड्ने उक्त आरसीसी पुल ७ करोड ८३ लाख ७५ हजार रुपैयाँमा निर्माण हुने भएको छ। निर्माण सम्पन्न भएपछि सो क्षेत्रमा करिब हजारौँ जनताको दैनिक आवत–जावत सहज हुने, कृषिजन्य वस्तुको बजार पहुँच बढ्ने र स्थानीय व्यापारिक गतिविधिमा उल्लेख्य वृद्धि हुने अपेक्षा गरिएको छ।
शिलान्यास समारोहलाई सम्बोधन गर्दै नेता सुनिल शर्माले पुल निर्माण समयमै र गुणस्तरयुक्त रुपमा सम्पन्न हुने विश्वास व्यक्त गरे। उनले भने, “विकासका काममा ढिलासुस्ती र कमिसनको संस्कृति अब सह्य हुँदैन। जनताले महसुस गर्ने काम बोलोस्, हिसाब किताब स्पष्ट हुँदैन भने त्यो विकास होइन।”
शर्मा पछिल्ला वर्षहरूमा निःशुल्क स्वास्थ्य सेवा, आकस्मिक उपचार सहयोग र सामाजिक उत्तरदायित्वमूलक गतिविधिका कारण मोरङ क्षेत्र नं ३ मा मात्र होइन, देशभर सजिलै पहिचानिएका लोकप्रिय युवा नेताका रूपमा उभिन थालेका छन्।
राजनीतिमा जनविश्वास घट्दै गरेको समयमा भ्रष्टाचारविरुद्धको स्पष्ट आवाज, व्यवहारिक नेतृत्वशैली र सेवा–धर्ममा सक्रियता ले शर्माप्रति स्थानीयको भरोसा झन–झन गहिरिँदै गएको समेत कार्यक्रममा सर्वसाधारणले खुलेर व्यक्त गरे।
सो अवसरमा मेयर मोहन तुम्वापोले नगरपालिकाले समन्वय, सहयोग र निगरानीमार्फत निर्माणलाई प्राथमिकतामा राख्ने बताए। प्रदेश सांसद गीता तिम्सिनाले पुल निर्माणले स्थानीय विकासको नयाँ अध्याय सुरु गर्ने बताइन्।
आफ्नै आँखै अगाडि प्रतीक्षित संरचना निर्माणको शुरुवात देख्न पाएका स्थानीयहरू खुसी र आशावादी मनस्थितिमा देखिन्थे। नौमती बाजाको सुरिलो धुन र फूलमालाको स्वागतबीच सम्पन्न कार्यक्रमले आज पथरीशनिश्चरेमा विकासको आशा फेरि एकपटक प्रबल रूपमा सुनियो।