पथरी / कला साहित्य प्रवद्र्धन समितिको आयोजनामा भएको पथरी शनिश्चरे नगरस्तरीय खुल्ला कविता प्रतियोगिताको उपाधि वडा नं २ का लोकसागर साम्बाले चुमेका छन् । शनिवार सम्पन्न भएको प्रतियोगितामा साम्बाको कविता प्रथम भएको हो । साम्बालले नगद रु १५ हजार, प्रमाण–पत्र प्राप्त गरे ।
प्रतियोगितामा रेडस्टार बोर्डिङमा अध्ययनरत प्रसुना तिम्सिनाको कविता दोश्रो तथा सिंहबाहिनी माविमा अध्ययनतर लाजिमा सुन्दासको कविता तेस्रो भएको थियो । साथै सिहंबाहिनीकै पवित्रा खनालको कविताले सान्त्वना स्थान ओगट्दै क्रमश ः नगद रु १० हजार, ५ हजार र २ हजार पुरस्कार राशि प्राप्त गरेका थिए ।
पथरी शनिश्चरे नगरपालिकाको मुख्य सहयोग र कला साहित्य प्रवद्र्धन समितिको आयोजनामा भएको उक्त कार्यक्रममा पथरी शनिश्चरे नगरका निवर्तमान नगर प्रमुख दिलिपकुमार राईको प्रमुख आतिथ्यता रहेको थियो । कार्यक्रममा नगरकै पुराना मुर्तिकार कृष्णभक्त गजमेरलाई नगद २५ हजार पुरस्कार राशिसहित सम्मान गरिएको थियो ।
कार्यक्रममा नगरका प्रवक्ता नवीन कार्की, वडा नं २ का अध्यक्ष नैना राई, वडा नं ७ का अध्यक्ष उद्धवराज बस्नेत लगायतको उपस्थिति रहेको थियो । कला साहित्य प्रवद्र्धन समितिका अध्यक्ष धनराज राई (अमिर)को सभापतित्वमा भएको कार्यक्रममा साहित्यकार लक्ष्मीप्रसाद फुयाल, टेलिसिरियल निर्देशक हरेन्द्र खत्री, नाटक लेखक निर्देशक जीवन बराल लगायतको सक्रियता रहेको थियो ।