बेलबारी ।
उद्घाटन खेलमा बिजयी हुदै झापाको रोलिङ क्लब धुलाबारी बेलबारी बुद्ध एयर अन्तर्राष्ट्रिय आमन्त्रण गोल्डकप फुटबल प्रतियोगिताको क्वाटर फाइनलमा प्रवेश गरेको छ । मोरङको बेलबारी नगरपालिका–११ लक्ष्मीमार्गमा मंगलबार भएको खेलमा विराटनगरको पेम्बा युथ क्लबलाई १–० गोल अन्तरले पराजित गर्दै धुलाबारीले अन्तिम आठमा स्थान बनाएको हो ।
झापाको जितमा रेजिन सुब्बाले ५१ औँ मिनेटमा गोल गरेका हुन । त्यसपछि खेलमा कुनै गोल हुन सकेन ।
प्रतियोगिता असोज २५ गतेसम्म सञ्चालन हुने छ । प्रतियोगितामा नेपालका ७ र विदेशका ३ गरेर १० वटा टिम सहभागी छन् ।
भारतको एमएम एफ सी वेष्ट बंगाल र सिरहाको सहलेस युथ क्लबबीच बुधबार प्रतिस्पर्धा हुने छ ।
प्रतियोगिताको विजेता टिमले ८ लाख १ हजार र उपविजेताले ४ लाख १ हजार नगद पुरस्कार पाउने डाँगीहाट युथ क्लबका अध्यक्ष एवं प्रतियोगिता संयोजक विक्रम वान्तवा राईले बताए ।