उर्लावारी / मिक्लाजुङ गाउँपालिका–४, छत्रपुरस्थित श्री सृजना आधारभूत विद्यालयका ३० जना विद्यार्थीका लागि यस वर्षको जाडो विशेष बन्यो। दुर्गम भौगोलिक अवस्था र कठिन यात्रा पार गर्दै सञ्चारकर्मी सम्झना राईले विद्यालय पुगेर विद्यार्थीहरूलाई न्यानो कपडा वितरण गरेपछि विद्यालय परिसर खुसी र उत्साहले भरिएको थियो।
लामो समयदेखि पर्याप्त लुगा, जुत्ता र जाडो छल्ने सामग्रीको अभावमा कठ्याङ्ग्रिँदो मौसममा पनि पातला कपडामै कक्षा लिँदै आएका विद्यार्थीहरू न्यानो कपडा पाएपछि निकै हर्षित देखिन्थे। उनीहरूका लागि यो सहयोग केवल जाडो कपडामात्र नभई माया, हौसला र शिक्षाप्रतिको भरोसाको रूपमा आएको छ।
पहाडको काखमा अवस्थित उक्त विद्यालय पुराना, काठले बनेका र जिर्ण कक्षाकोठामा सञ्चालन हुँदै आएको छ। सीमित साधनस्रोत र न्यून सुविधाबीच पनि २–४ जना विद्यार्थी एउटै कक्षाकोठामा बसेर अध्ययन गर्दै आफ्नो भविष्य निर्माण गर्ने सपना देखिरहेका छन्।
न्यानो कपडा वितरणपछि विद्यार्थीहरूको अनुहारमा देखिएको मुस्कानले सहयोगको महत्व झल्किन्थ्यो। विद्यालयका प्रधानाध्यापकले दुर्गम क्षेत्रमा आएर गरिएको सहयोगप्रति धन्यवाद व्यक्त गर्दै भने, “यस किसिमको सहयोगले जाडोमा विद्यार्थीको उपस्थितिमा सकारात्मक प्रभाव पार्छ र पढाइ निरन्तर राख्न प्रेरणा मिल्छ।” त्यस्तै विद्यालय व्यवस्थापन समिति अध्यक्षले पनि पहुँच र सुविधा कमै पुगेको यस क्षेत्रसम्म आइपुगेको मानवीय पहलको खुलेर प्रशंसा गर्दै आभार व्यक्त गरे।
जहाँ विकास र सुविधा पुग्न अझै बाँकी छन्, त्यहीँ पुगेर गरिएको यो न्यानो प्रयासले सृजना आधारभूत विद्यालयका विद्यार्थीहरूलाई जाडोको कठोरतासँग जुध्ने शक्ति मात्र होइन, उज्यालो भविष्यप्रतिको आत्मविश्वास पनि थपिदिएको छ।