पथरी / उच्च शिक्षालय तथा माध्यमिक विद्यालय सङ्घ नेपाल, मोरङ (हिसान) द्वारा आयोजित हिसान खेल सप्ताह २०८१ मा जिल्ला स्तरीय नकआउट भलिबल र फुटबल दुवै प्रतियोगितामा रेडस्टार छात्रा टिम प्रथम र छात्र टिम ‘फस्ट रनर अप’ हुन सफल भएको छ।
फुटबल ,भलिबल ,क्रिकेट, ब्याडमिन्टन लगायतका विभिन्न खेलहरूको आयोजना गर्दै उक्त हिसान खेल सप्ताह बुधबार साँझ विराटनगरस्थित सहिद रङ्गशाला खेलमैदानमा समापन भएको थियो।
समापनका क्रममा हिजो बुधबार साँझ फक्स लाइट बालेर खेलाइएको छात्र तर्फको निकै सन्सनीपूर्ण प्रतिस्पर्धात्मक जिल्लास्तरीय फुटबल प्रतियोगितामा विराटनगरको कान्तिपुर कलेजले रेडस्टार माविलाई ० का विरुद्ध १ गोल गर्दै उपाधि चुम्यो भने रेडस्टार मावि फर्स्ट रनर अप हुन सफल भयो।
यसैगरी, मोरङको पथरी शनिश्चरे वडा नं २ मा रहेको रेडस्टार माध्यमिक विद्यालयले उक्त प्रतियोगितामा फुटबल भलिबल लगायतका विभिन्न विधाहरूमा पुरस्कारहरू प्राप्त गरेको थियो।
छात्रा तर्फको प्रतिस्पर्धात्मक फुटबल प्रतियोगितामा रेडस्टार माध्यमिक विद्यालयले ओर्चिड कलेज (orchid collage) विराटनगरलाई ३-० को गोल अन्तरमा पराजित गर्दै उपाधि उचाल्यो भने जिल्ला स्तरीय अन्तरविद्यालय नकआउट भलिबल प्रतियोगितामा रेडस्टार छात्रा टिम जिल्ला प्रथम भएको छ। रेडस्टार छात्रा टिमले मोडर्न एरा विराटनगरलाई सोझो दुई सेटमा पराजित गर्दै उपाधि उचालेको हो।
यसैगरी, निकै सनसनीपूर्ण र प्रतिस्पर्धात्मक माहोलमा
विराटनगरको शहिद रंगशालामा साँझ सम्पन्न भएको सो फाईनलमा कान्तिपुर कलेज र रेडस्टार मावि बिच सम्पन्न भएको उक्त प्रतियोगितामा रेडस्टरका सोनाम छिरिङ गुरुङ ‘म्यान अफ द म्याच’ घोषित भए भने रेडस्टारकै सौगात राई ‘बेस्ट मिडफिल्डर घोषित भएका थिए।उता , छात्रा तर्फको फुटबल प्रतियोगितामा रेडस्टार टिमका छात्रहरू क्रमश: विद्या राई ‘बेस्ट किपर’, सलिजा राई ‘ बेस्ट मिडफिल्डर’, स्मृति राई ‘बेस्ट प्लेयर’ घोषित भए ।
भलिबल प्रतियोगितामा रेडस्टारकै छात्रा आस्मा लिम्बू , स्मृति राई लगायत उत्कृष्ट खेलाडीहरू विभिन्न विधामा पुरस्कृत भए। त्यस्तै, छात्र तर्फको भलिबल प्रतियोगितामा रेडस्टारका छात्र विनोद धिमाल बेस्ट सर्भिस र सुरज राई बेस्ट डिफेन्स भए।
सोहि क्रममा कक्षा ११ मा उत्कृष्ट जिपी ल्याई उत्तीर्ण विभिन्न विद्यालयका छात्र छात्राहरूलाई पनि पुरस्कृत गरिएको थियो।।
हिसान मोरङका केन्द्रीय उपाध्यक्ष भेषराज पोखरेलको प्रमुख आतिथ्यता र हिसान मोरङ्ग अध्यक्ष अमित ढकालको अध्यक्षतामा सम्पन्न भएको पुरस्कार वितरण समारोहमा शिक्षा समन्वय इकाइ मोरङका प्रमुख जीवन गड्तौला, हिसान कोशी प्रदेश अध्यक्ष ज्ञानबहादुर खड्का,हिसान मोरङ उपाध्यक्ष टिएन तिम्सिना, मोरङ प्याब्सन अध्यक्ष जगत बस्नेत, निवर्तमान मोरङ प्याब्सन अध्यक्ष प्रेमलाल सिंह सुवाल लगायत हिसानका केन्द्रीय, प्रदेश र जिल्ला तहका विभिन्न पदाधिकारीहरूको उपस्थिति रहेको थियो। उक्त अवसरमा जिल्ला समन्वय इकाइ मोरङका प्रमुख जीवन गड्तौला, प्याब्सन मोरङका वर्तमान अध्यक्ष जगत बस्नेतले समेत शुभकामना मन्तव्य राख्नुभएको थियो।
उक्त अवसरमा विभिन्न विधाहरूका विजेता विद्यालयहरूका छात्र छात्राहरूलाई ट्रफी, मेडल तथा प्रमाणपत्र सहित पुरस्कार वितरण गरिएको थियो।