पथरी / मोरङको पथरी शनिश्चरे नगरपालिकामा बडा दिन ख्रिष्टमस शुभकामना सम्मान तथा सांगीतिक कार्यक्रम २०८१ धुमधामका साथ सम्पन्न गरिएको छ ।पथरी शनिश्चरे नगरपालिकाका प्रमुख मोहन प्रसाद तुम्वापोको प्रमुख आतिथ्यमा बडा दिन ख्रिष्टमस शुभकामना सम्मान तथा सांगीतिक कार्यक्रम भएको हो ।
प्रमुख अतिथि तुम्वापोले नगरवासी स्वदेश तथा विदेशमा रहनुहुने सम्पूर्णमा क्रिसमसको शुभकामना व्यक्त गर्नुभयो । आइतबार पथरी शनिश्चरे वडा नं. १ को यलम्बर चौकमा सो कार्यक्रम गरिएको थियो । पथरी शनिश्चरे नगर इसाई समाजले आयोजना गरेको बडा दिन ख्रिष्टमस शुभकामना सम्मान तथा सांगीतिक कार्यक्रममा नगरका ३५ वटा चर्जहरुको संयुक्त उपस्थिति रहेको थियो ।
सो कार्यक्रममा कोशी प्रदेश इसाई समाज सल्लाहकार पा.रेभ दानियल लिम्बुको प्रवचन प्रस्तुत भएको थियो । यसैगरी स्थानीय कलाकारहरुको आकर्षक नृत्य र क्रिश्चियन म्यूजिक ब्याण्ड हेफ्जिबाहको सांगीतिक प्रस्तुति रहेको थियो । सो कार्यक्रममा वडाध्यक्षहरु भीम कुमार राई, विजय लिम्बु, लोककिरण न्यौपाने (लोकनाथ), उद्धवराज बस्नेत, नविन कार्की र युवा व्यवसायी एवं सुनाखरी माविका विव्यस अध्यक्ष प्रदिपकुमार राई, विभिन्न चर्जका पास्टरहरुको उपस्थिति रहेको थियो ।